كل يوم نفس الموال.. نقفل النور الساعة 10 بالليل ومانهداش وننام قبل 12 أبدًا، وألاقي نادين بنتي بتقول لي: إزاي يعني يا ماما أنام بسهولة كده!
من أكثر من سنة، حطيت روتين للنوم ومكان ثابت وبعد الاستجابة لده، كان أكبر إنجاز قدرت أوصل له هو إنها تستغرق ساعتين بس عشان تنام.. الحقيقة كانت بتاخد وقت أكثر من كده في الأول، قعدت أحسبها مع نفسي كده لقيت إن فيه 60 ساعة من عمري بتضيع شهريًا في محاولات إني أنيِّم دودي، يعني ما يعادل 720 ساعة في السنة، كثير أوي يا جماعة لدرجة إني زهقت! خليني أحكي لكم عن بعض المحاولات المستحيلة في نوم نادين!
اقرئي أيضًا: حيل وخطوات لتعويد طفلك على النوم مبكرًا
أول ما بنقفل النور، تبدأ نادين في الجري وكأننا لسه هنبدأ نشاطنا، وتبدأ تخترع مشاوير زي مثلًا إنها تروح الثلاجة وبعد عناء بشيلها وبدخلها الأوضة، مش برضاها طبعًا.
قعدنا على السرير وأخذنا وضعية النوم، تبدأ ليستة طلبات النوم، آه أنا مسمياها كده:
ماما عاوزة مية.. حاضر.
ماما عاوز همم.. لا يا حبيبتي إحنا أكلنا خلاص دلوقتي هننام.
ماما كيكي.. لا يا حبيبتي إحنا لسه مغيرين ومفيش كيكي ولا حاجة.
ماما نونة.. مكرونة! يا لهوي يا بنتي.. نامي الله يهديكي.
ماما بوبّة.. ودي معناها في لغتها "شوربة"، وطبعًا لما بسمعها بودِّي وشي الناحية التانية!
ماما بابا فين؟ بابا نام ننه خلاص.
وماما فين؟ مش عارفة دوري عليها في جيبك!
ماما وجدي ننة؟ جوجو ننة؟ آه وجدي نام من بدري -وجدي وجوجو أصدقائها في الحضانة.
ماما عاوزة نانا.. لبانة إيه يا بنتي دلوقتي! نامي وبكرة نروح لعمو الصبح أجيب لك لبانة.
ماما عمو ننة؟ آه يا روحي عمو نام ننة مش هيصحى غير الصبح نامي بقى!
كل اللي فات ولا حاجة، فيه قدهم مرتين ثلاثة بس المقال مش هيكفيهم كلهم، ونادين مبتسكتش إلا لما أقفل عيني ومردش عليها بعد محاولاتها إنها تفتح عيني بالعافية وتتنطط على بطني وتقلبني زي السمكة المقلية في الطاسة يمين وشمال عشان تتأكد إني نمت تمامًا.
في اللحظة دي بس، تبدأ نادين تاخد جنب وتغني كام أغنية مع نفسها وترتل شوية كلمات سحر وشعوذة مبفهمش منها حاجة وتاخد إيدي بالعافية تحطها على جزء معين منها "رأسها أو بطنها أو ظهرها" حسب مزاجها، وده طبعًا علشان تطمن إني موجودة.. وفي النهاية بلاقيها في لحظة واحدة نامت وأنا بتنهار كل خططي وأحلامي وطموحاتي اللي كنت ناوية أعملها في الساعة دي!
بس أنا مبسوطة إنه على الأقل فيه روتين يومي وعلى الأقل هي عارفة إن دي طقوس النوم، وعندي أمل في بكرة إنها تدخل تنام لوحدها من غير ما تضيع من عمر أمها حبيبتها 720 ساعة في السنة!!
