نصائح مجربة وعملية لتشجيع طفلك على استخدام الحمام (النونية)

في الوقت اللي خدنا فيه القرار اننا نبدأ مع طفلنا مرحلة انه يستخدم النونية أو التويلت ممكن تواجهي مشكلة أنه أصلا يكون رافض انه يستخدمهم..

 

مهم أنك تعرفي ان الطفل بيكون متعود على وضع معين انه يعمل في الحفاضة لفترة طويلة من حياته وبالتالي بياخد فترة لحد ما يعمل في الحمام ويتعود عليه.

 

في الفترة اللي كنت باخد فيها قرار التخلي عن الحفاضات لعمر قريت أن فيه أطفال بتخاف من القاعدة على التويلت نفسها بيبقوا حاسين انهم هيقعوا .. طيب ايه الحل؟

 

المشكلة دي واجهتني مع عمر كان يقعد مدة طويلة على التويلت من غير ما يعمل وبمجرد ما يقوم يعمل على الأرض .. طبعا في الوقت ده لازم تهدي ومتزعقيش 

 

فيه أمهات نصحوني باني اخليه يشرب ميا قبل ما يدخل الحمام او احط ميا كتير على ايده بس الطرق دي كلها مكنتش فعالة مع عمر بس جربوها ممكن تنفع معاكم.

 

الطريقة الوحيدة اللي نتايجها كانت ايجابية مع عمر اني اخليه يعمل في الحمام وهو واقف زي ما اتعود يعمل في الحفاضة وفعلا استجاب وبدأ يطلب انه يعمل في الحمام.

 

في التبرز بقى الموضوع اصعب لأن عمر بطبيعته ممسك وبالتالي بيكون صعب ومع استشارة الدكتورة قالتلي انه هيحتاج ملين، عامة الطفل اللي معندوش المشكلة دي تقدري تعرفي معاد حمامه امتى وتقعديه على طول في الوقت ده، او تجربي معاه بعد كل وجبه.

 

وزي ما قلنا قبل كده اسلوب المكافاة والجوايز بيجيب نتيجة حلوة جدا مع الاطفال في السن ده، كمان بلاش تحسسيه انك بتضغطي عليه او بتعندي قدامه لانه ممكن يعند اكتر خليكي صبورة وحاولي معاه كتير لحد ما توصلي للنتيجة اللي عاوزاها

 

وبكده خلصت حلقتنا النهارده استنيني في الحلقة الجاية علشان اقولك نصايح اكتر هتساعدك في تدريب طفلك علي النونية.

عودة إلى صغار

فيديوهات سوبرماما
موضوعات أخرى
supermama
Share via WhatsappWhatsapp IconSend In MessengerMessenger IconShare via FacebookFacebook Icon