"أنا حاسة انك مش بتعتني بيا زي كارمن."
صدمتني بنتي الكبيرة ماريا بالجملة دي، فجأة وأنا بقفل نور أوضتها عشان تنام. صدمتني ورعبتني.. وقفت واتفاجئت إنها بتشكي من الحاجة اللي بحاول اتجنب إني أعملها من يوم ولادة أختها الصغيرة.
دايمًا كنت متخيلة إني باخد بالي من كل تصرف، وإني مش بفرَّق بينهم أبدًا بالعكس، باحاول أهتم بماريا الكبيرة أكتر عشان ماتحسش بغيرة.
اقرئي أيضًا: حواديت ماما: مازن وحبيبته آينور
رجعتلها وخدتها في حضني وسألتها ليه بتقولي كدة؟
قالتلي إنتي بتشيليها وتحطيها في سريرها وتأكليها وتشيليها وتكرَّعيها.
حاولت أشرحلها إني بعمل الحاجات دي ﻷختها لأنها صغيرة ومش عارفة تعملهم لنفسها، وإني كنت بعمل لها نفس الحاجات وهي صغيرة، عشان ماكانتش بتعرف تعملها. لكن دلوقت هي كبرت وبقيت بعمل لها حاجات تانية أهم وأحلى؛ زي إني ألعب معاها وأخرج معاها ونرسم سوا أو نخرج سوا، وبقول لها أسراري، وهي "صاحبتي المفضلة." لكن كل ده ماعجبهاش، بصت لي من فوق لتحت وقالت لي لا مش عايزة الحاجات دي خالص.
- أومال عايزة إيه يا ماريو؟
بصت لي بمنتهى الجدية وقالت لي: عايزاكي تكرَّعيني!
