أنا: دودي ممكن تديني بوسة؟
دودي: لأ.
ودي كانت أول كلمة تنطقها بنتي الجميلة، ومع إنها كلمة مستفزة وتشير إلى مستقبل مُبهر معاها مليان بالعند وكلمة "لأ"، فإن أول كلمة كانت أحلى كلمة سمعتها وقتها، مع إنها أبوخ كلمة بسمعها دلوقتى!
وعدت شهور، وبدأ قاموس الكلمات يكبر وعددها يزيد، وبدأت أفهم شوية بشوية احتياجاتها ومطالبها اللي بتعبر عنها بالكلام، وبدأت لغة الإشارة تختفي شوية بشوية إلى حد ما. حاجة مبهجة جدًا لما تلاقي بنتكِ/ابنكِ أصبح يقدر يعبر عن مشاعره ومطالبه واحتياجاته، زيه زيك بالظبط، ولسانه أحيانًا بيكون أطول منه ويفاجئكِ كل يوم بكلمة جديدة لقطها من حد جديد أو من صاحب بيحبه.
في يوم جات دودي من الحضانة، وبدل ما تقولي ماما قالتلي "مامي"، وبدل ما تقول بابا قالت "بابي".. فقلت ميضرش يا بنتي قولي اللي إنتي عاوزاه. في يوم تاني لقيتها بتكرر الكلام اللي بقوله بالضبط، بطريقتها طبعًا وحروفها اللي هي ناقصة نصف الحروف تقريبً ا، وبقيت سعيدة جدًا إن محدش فاهمها غيري، وأبقى منشكحة جدًا وأنا باترجم للناس اللي هي بتقوله وكأني بقولهم "أنا أكتر واحدة فاهمة دودي". :)
اقرئي أيضًا: علامات تطور اللغة عند الأطفال في العام الثاني
من أهم الحاجات اللي خلت لغة نادين تتطور، شوية نصائح كده جمعتها لكم من خلال تجربتي:
- كنت بقرأ معاها كثير جدًا من وهي بيبي صغير، وكل ما تكبر كنت بقرأ حاجات متنوعة أكثر، بس كنت مركزة على الحاجات اللى هي بتشوفها زي الأكل والحيوانات مثلًا.
- مكنتش ببطل كلام معاها، وكنت باحاول على قد ما أقدر أزود وقت التفاعل بيني وبينها، بعيد عن التلفزيون أو التابلت، مامنعتش تمامًا لكن كنت مقننة ومتحفظة جدًا على نوع المشاهدة ووقتها، وقننته بوقت محدد، ولغاية دلوقتى الوسائل دي مش بتمثل لها أهمية كبيرة في حياتها زي اللعب معايا.
- كنت دايمًا بناديها باسمها، وأكرر كتير لغاية ما هي عرفته وحفظته.
- الربط بين التصرفات اليومية وإشارات معينة بيني وبينها، يعني لما كنت بشاور على بقي بقول "هناكل مم" وهكذا.
- أول ما الجرس يرن كنت أندهش قدامها وأقولها "بابا جه" كإشارة إن لما الجرس يرن يبقى أكيد فيه حد بره الباب، وبعد شوية بقت بتعمل زيي بالظبط مع كل رنة جرس.
- لما كانت تعمل الغلط وأقولها "ياي"، ولما كانت تعمل حاجة حلوة أقولها "واو"، ولما تعمل حاجة جميلة تشد انتباهنا وتحرز تقدم معين لازم أسقف وأقول "برافو"، ودول كانوا من أول الكلمات اللي عرفتهم دودي وبقت تعبر بيهم عن اللي هي بتعمله أو اللي إحنا بنعمله.
اقرئي أيضًا: جدول تطور الكلام لدى الأطفال بالعمر
