كل الستات بتحلم إنها تخلف بنات عشان تسرَّح لها شعرها وتلبسها تِوك وتعمل فيها اللي معملتوش في نفسها، وأنا زي كل الستات مش مختلفة كتير.. أول ما عرفت إنها بنت كنت بجيب توك أشكال وألوان أحيانا كنت بدخل المحل مشتريش غير توك وأخرج تاني!
اقرئي أيضًا: 9 مميزات لإنجاب البنات
لغاية ما دودي شرَّفت، والحمد لله مكنش عندها شعر فكنت بكتفي بالسورتيت، لغاية ما إيدها طولت وبدأت تشيل السورتيت كمان وأنا كنت زعلانة جدًا، لدرجة إني أحيانًا كنت ببوس إيدها علشان متشيلوش، وكبرت دودي وإيدها طولت أكثر وبقت تشيل التوك بكل أنواعها، وإذا سرحنا شعرها أصلًا يبقى نبوس إيدنا وش وظهر!
اقرئي أيضًا: بالصور.. تسريحات شعر للبنات من وحي أميرات ديزني
سلِّمت أمري لله، وبقيت كل ما شعرها يطول أقصه لأنه خفيف وهايش، ولو ما اتلمش بتوكة بتبقى عاملة زي "سوكة العبيطة"، وأنا مش حِمل المنظر ده كل يوم يعني، وفقدت الأمل خلاص.
لغاية ما حصلت اللحظة الفاصلة في حياتي، ودودي بقت تطلب إنها تحط توكة -طبعا ده بعد ما عدينا سنتين وشوية- لا وتسرَّح كمان، لا والأكثر إنها تشوف نفسها في المراية، طبعًا ده كان له أعراض مصاحبة زي إنها كل يوم بتعمل رجليها بماكينة "Scholl Velvet" وبعدها تحط كريم مرطب على كعبيها، وتحط زبدة كاكاو على شفايفها مرتين ثلاثة في اليوم.. الحقيقة هي مش بس عوضتني عن السنتين اللي فاتوا، لأ هي بتعمل حرفيا اللي أمها مبتعملوش إلا كل كام يوم مرة!
المهم إني أخيرًا حسيت إني مخلفة بنوتة جميلة بتحط تِوك وتسرًّح شعرها، ولازم التوكة تليق مع الطقم طبعًا، وأحيانًا بنوصل لدرجة إنها بتعمل شعرها بالسيشوار.
البنات حلوين وطِعمين، ولما دودي تكبر أكثر هخليها تعمل لي شعري وتحط ليا ميك آب، وتيجي تعمل معايا "Bodycare"، وتختار ألوان لبسها وطريقة تسريحتها.
اقرئي أيضًا: لماذا خلفة البنات مبهجة؟
أنا مستنية دودي تكبر علشان تبقى أختي -أنا مليش إخوات بنات- وصاحبتي مش بس بنتي، هنلبس ونخرج ونتمشى ونتفسح ونطبخ ونشتغل ونلعب ونعمل كل حاجة سوا يا رفيقتي. :)
