حواديت ماما: ماما.. ارقصي معايا!

    تسلية

    من 6 شهور بالضبط، وقفت لعب رياضة نتيجة عوامل كتير كلها نفسية، وعادي حياتي ماشية، الحاجة الوحيدة اللي كانت واجعة ضميري هو إن دودي كانت بتلعب معايا، صحيح مش بتلعب بالضبط، لكن على الأقل كانت بتنط وتقلدني، من الآخر أنا كنت بتعمد ألعب قدامها كل يوم علشان تتعود على إن الرياضة حاجة أساسية في حياتها، ودي كانت أكتر حاجة مضايقاني لما وقفت رياضة، بس الحقيقة نفسيًا معنديش القدرة ولا المزاج اللي يخليني أعمل أي حاجة..

    اقرئي أيضًا: السن المناسب لكل رياضة يلعبها طفلك

    وفي يوم، جات دودي على غفلة، وقالت لي: "ماما.. قومي ارقصي معايا"!

    للوهلة الأولى أنا اندهشت جدًا من الطلب، وقلت "إيه اللي حصل للبنت؟ شوية وهتقولي شغلي لي مهرجانات"!

    بعدها من جوايا فرحت جدًا من الطلب وقمت وشغلنا أغنية هيصة ورقصنا مع بعض، أو بمعنى تاني اتنططنا واتهبلنا شوية مع بعض، واوعوا تفهموني غلط! أنا شغلت للبنت أغنية الأرقام بس الموسيقى كانت حلوة ومشجعة على الرقص والتنطيط.

    غير إن دودي فرحت جدًا، وأنا مزاجي اتظبط جدًا جدًا، ويمكن الوقت البسيط اللي رقصنا فيه مع بعض هو الوقت الوحيد اللي نفسيتي اتحسنت فيه خلال اليوم كله، غير إني فكرت بعد كده إننا نخليها كل يوم وتبقى بدل الرياضة، وأحاول أوصل لها أن الرقص والحركات اللي بنعملها هي رياضة، اممم بفكر أشغلها زومبا المرة الجاية مثلًا.. ليه لأ!

    الأطفال دول حاجة مبهجة جدًا، براءتهم وطلباتهم التلقائية النابعة من حب ومشاعر حقيقية مش مزيفة، واللي مفيش وراها أي أغراض خفية هي اللي بتخلينا نكمل، والبنات تحديدًا بيدوا للحياة طعم ولون وبهجة ملهاش مثيل.

    السعادة اللي بلاقيها مع دودي وإحنا لوحدنا مبشوفش زيها مع أي حد تاني حتى أقرب الناس ليا، سعادة ليها مكان لوحده في قلبي محدش يشاركها فيه.

    اقرئي أيضًا: 9 مميزات لإنجاب البنات

    وأدينا يا ست دودي رجعنا نلعب رياضة تاني، بس المرة دي رياضة مسلية جدًا وعلى الأغاني اللي انتي بتحبيها مش الموسيقى الغريبة اللي كنت بشغلها لك واحنا بنلعب أيروبكس زمان :)

    عودة إلى منوعات

    إيمان رفعت

    بقلم/

    إيمان رفعت

    أحب الكتابة فهي طريقتي في التعبير عن كل ما أعرفه وأشعر به. صديقي هو الكتاب وحياتي هي أسرتي الصغيرة.

    موضوعات أخرى
    supermama
    Share via WhatsappWhatsapp IconSend In MessengerMessenger IconShare via FacebookFacebook Icon