اتعودنا على إن الكبار هم مصدر الأمان، الطفل الصغير بيجري ويستخبى في فستان أمه من الناس والوحشة والأخطار، لكن حصلي أنا العكس.. لما لَمى اتولدت عودتها تنام في سريرها زي أي أم عصرية قرأت عن التربية الحديثة والعناية بالأطفال، وفضلت كده لغاية لما كبرت عن السرير النونو وآن الأوان تنام في سرير كبير، القرار كان صعب عليا، لأن السرير الكبير في حجرة تانية بعيد عن عيني وقلبي، وخفت كمان من ردة فعلها، وهل ده ممكن يأثر عليها نفسيًا ولا لأ؟
ولكن لولو أثبتت لي للمرة المش عارفة الكام إن شخصيتها قوية، وحبت الأوضة الجديدة، وسريرها وبقت تروح من نفسها تنام هناك.
مرت الأيام وحصلت تغييرات جديدة في حياتنا، اتنقل زوجي للعمل في مدينة تانية، وبقينا نتنقل أنا ولمى بين بيتنا وبين البيت الجديد مع والدها، بس لما كنا بنرجع بيتنا في القاهرة كنت قدام معضلة كبيرة، سريري الكبير والأوضة الموحشة، وحاولت إقناعها تيجي تنام جنبي لكنها أصرت على اختيار أوضتها، وكان الحل اللي وصلت له إني أشيلها كل يوم بعد النوم عشان تيجي تونسني.
اقرئي أيضًا: حواديت ماما: أهلًا بكم في مرحلة الفوضى
حطيت لنفسي أعذار كتير، زي إني خايفة عليها من البرد لوحدها، أو ممكن ترمي الغطاء وهي نايمة ومش حاسة، أو إني أخاف أسيب الدفاية شغالة وهي نايمة ولا قدر الله ممكن يحصل ماس أو أي حاجة مش عارفة هيا ايه، ولكن في الحقيقة أنا بخليها تنام جنبي عشان خايفة أنام لوحدي.
أنفاس اللولو الهادية وهي نايمة جنبي، إيدها اللي بتمسك في إيديا بتديني الأمان والإحساس بالراحة والونس، والسؤال هو إزاي ده بيحصل وتنقلب الآية؟ هل لولو هي اللى كبيرة ولا أنا الصغيرة الخايفة؟
بصراحة في أوقات كتير أنا بتعلم من لمى، فطرتها السليمة، وغريزتها القوية وصراحتها في التعبير عن رأيها بتخليها تقول كلمات بسيطة، لكن واضحة أكتر من ناس كتير أكبر وأعمق في حياتي.
اقرئي أيضًا: حواديت ماما: الفليسوف الصغير
لمى مراية اتعودت أشوف فيها أخطائي، وعارفة إني لو غلطت قدامها مش هتعديها بالساهل، هتقف وتسأل وتتطالب بالتفسير المقنع والمنطقي، ولو قلت كلام مش متناسق هتلاقي فيه نقاط الضعف.
مبتكسفش اعتذر لبنتي لما باغلط، سواء في حقها أو في أي حاجة باعملها، عشان باكون قدام خيارين، الأول إني اعتذر وأعبر عن خطئي وأعلمها فضيلة الاعتذار، أو أعلمها حاجة غلط تفضل معاها طول العمر.
نظرتي السابقة للأطفال على إنهم كائنات ساذجة صغيرة معتمدة علينا كانت خاطئة كليًا؛ زي ما هي معتمدة عليا أنا كمان معتمدة عليها، الأمان والحنان والحب بينا متبادل، عشان كده باعتبر علاقتي معاها أقوى علاقة في حياتي حاليًا.
