بصفتك أم، مسئولة عن البيت والأولاد، فبالتالي فكرة الكلفتة في السرير غالبًا غير مناسبة وغير قابلة للتنفيذ طوال اليوم في الشتاء، لكن المفاجأة السعيدة إنك تقدري تدفي نفسك كويس جدًا أثناء الحركة والتنقل في المنزل بدون كلفتة أو ملابس كتير تعوق حركتك:
1- الحركة: الحركة بتساعد جسمك على تنشيط الدورة الدموية وبالتالي الشعور بالدفء والنشاط، طبيعي إنك بتتحركي بين المطبخ والغرف والحمام وما إلي ذلك.
2- طبقتين من الملابس الضيقة نوعًا ما أسفل الهدوم هتفي بالغرض، مثلاً البوديهات القطن بكم طويل أو نصف كم، هتساعدك في الحفاظ على حرارة جسمك وفي نفس الوقت بدون ارتداء 10 طبقات صوف، هتعطيكِ نفس الإحساس.
3- الجوارب، الشرابات مهمة جدًا للحفاظ على تدفئة رجلك، ممكن تلبسي لكلوك كروشية أو شبشب مبطن لتدفئة رجلك وسهولة الحركة.
4- مشروبات دافئة زي الشاي الأخضر، اليانسون، حمص الشام، الزنجبيل، السلحلب والشاي بلبن..هتساعدك على بقاء جسمك دافئ فترة طويلة.
5- اعملي كيكة، أو أي مخبوزات في الفرن واستمتعي بالدفء والرائحة المميزة للمنزل وتحديدًا المطبخ.
6- قربة مياه دافية هتفيدك جدًا للتدفئة لو كانت متوفرة في المنزل.
7- الحفاظ على تدفئة المنزل، سواء بإغلاقة النوافذ جيدًا أو بتشغيل دفاية في الغرفة.
8- تناول طعام صحي على مدار اليوم، ابعدي عن السكريات والحلويات، واهتمي بالفواكه والخضروات والشوربة الصحية زي شوربة العدس. (اقرأي أيضًا: 7 أنواع شوربة لتزين سفرتك في الشتاء)
9- وأخيرًا حمام دافئ قبل النوم له تاثير عظيم على تدفئة جسمك. (اقرأي أيضًا: دليلك للاستحمام بسهولة في الشتاء)
* ملحوظة سريعة:
في حالة الخروج من المنزل متنسيش: الجوانتي، البالطو والسكارف أو الكوفية مع الاهتمام بارتداء ملابس خروج من الصوف أو الأقمشة الثقيلة خاصة في حالة الخروج ليلاً، لتجنب نزلات البرد.
