بعض الأمهات يشعرن الآن أنهن كالآلة التي لا تتوقف، بعد أن كُنّ في بيوت أهاليهن يحملن أطباقهن إلى المطبخ بصعوبة :D في هذا المقال، جمعنا لكِ بعض إجابات الأمهات على سؤال ماذا غيرت فيكِ الأمومة؟
قالت أميرة: "الأمومة غيرت مقاسي من لارج لـ3 إكس لارج" :D
وأضافت منى: "علمتني العصبية وإن تليفوني مش بتاعي لوحدي".
وأكدت سهى: "الأمومة علمتني الصبر، أي نعم عصبية وصوتي عالي بس بصبر، عرفتني قد إيه أنا غالية قوي على بابا وماما، زاد الحب أضعاف الأضعاف".
أما أمنية، فقالت: "بقيت حاسة بماما وحماتي أكتر، وبقيت عصبيتي أقل، وعرفت أتعامل مع الأطفال بعد ما كنت بكرههم، الأمومة زودت عندي معرفة بموضوعات أكتر لأن كل موقف بيحصل لي بقرأ عنه مقالين أو ثلاثة".
وأكملت مها: "اتحوّلت من أنثى رقيقة، لكائن صوته عالي وتخين" :D
بينما قالت مي: "الأمومة قسمت جسمي لاتنين كمان، بقينا زي التوأم الملتصق، لا بتبسط ولا بفرح، ولا حتى بعرف أتصور غير وإحنا لازقين في بعض، وأشتكي بس برضه مقدرش يعدي يوم من غيرهم، خلوا لحياتي معنى، الله يبارك لي في عمرهم وأشوفهم أحسن حاجة في الدنيا".
وأضافت أسماء: "حبيت ماما أكتر بكتير، بخاف عليها أكتر، مبحبش أزعلها بحاول أرضيها علشان تبقى مرتاحة وأسمع دعوتها، علشان حبي وخوفي وقلقي على ابني خلوني أتأكد إحنا إيه بالنسبة لماما".
وأوضحت شيرين: "اتعودت أنام وقت قليل، وأنزل من غير ميكاب، واتعودت على السرعة وأنا بعمل شغل البيت، وأعمل كل حاجة بإيد واحدة، وبقيت عاقلة عن الأول كتير".
وردت ندى: "الأمومة خلتني أتخانق مع دبان وشي واتجننت" :D
وقالت بسمة: "قولوا الأمومة مغيرتش فيا إيه، أنا هسكت لأن صعبان عليّ نفسي" :D
وأضافت ولاء: "اكتشفت إني بقيت أمنا الغولة كده بجري ورا العيال، وأزعق في أي مكان وقدام أي حد، وبعد ما أضربهم وأهدى، أبتدي أفوق إن حواليا ناس بتتفرج عادي، وأبتدي أدعي بقى عليهم وعلى اليوم اللي اتجوزت فيه" :D
وقالت رحاب: "بقيت باكل الأكل بارد، وبطلت أشرب أي حاجة سخنة، وبطلت آخد شاور طويل، وصوتي بقى بيسمع الجيران كلها".
وأضافت رنا: "كرشي بقى 7 طبقات، وشعري كله وقع، بقيت عصبية وبتوتر بسرعة، وبقيت بحس بأهلي أكتر، وعرفت قيمة ماما الله يرحمها".
وبالرغم من كل هذه التعليقات، فالأمومة أقوى غرائز الأنثى على الإطلاق، وتتلخص في التحمل والبذل والعطاء والصبر والقوة، وأنتِ يا سوبر أخبرينا في التعليقات ماذا غيرت فيكِ الأمومة؟ وشاركي هذا المقال مع صديقاتكِ.
