حواديت ماما: أنا والتسنين وفريدة

تسلية
طبعًا واضح من العنوان إني هاحكي لكم عن مرحلة العضعضة في حياة الطفل الرضيع، اللي بيبدأ فيها يشوف كل حاجة وأي حاجة، أشياء قابلة للعض والتفعيص ودخول الفم والريالة المفرطة، مرحلة التسنين وجمال مرحلة التسنين وتحول الأم لزومبي متحرك في المنزل.

"أنا بتمرمط".. بمنتهي الصراحة ده عنوان المرحلة..

آسفة لكل مامي جديدة لسّه على أعتاب المرحلة دي، بس كل ما عرفتي حقيقتها كل ما قدرتي تواجهيها، صدقيني تربية كائن عضاض عصبي متقلب المزاج بيسنن.. محتاجة صبر أيوب وقوة هرقليز ودعوات أولياء الله الصالحين.
في البداية، وما يسبق مرحلة بزوغ الأسنان، فريدة كانت عبارة عن حنفية ريالة مفتوحة، تريل ولعاب سايل 24 ساعة حتى وهي نايمة، مصاحب له زن متواصل وتقلبات نوم سيئة جدًا، وكإننا عُدنا للأسابيع الأولى بعد الولادة.. والأعراض دي استمرت 5 شهور!
 
اقرئي أيضًا: التسنين وأعراضه وكيفية التعامل معه
 
آه والله.. 5 شهور بداية من الشهر الرابع، وحتى بزوغ أول سنّة مع بداية الشهر التاسع، ثمّ ظهرت السنّة التانية على طول وبقى عندها سنتين مهمتهم الوحيدة -لأ مش الأكل- العض بشراسة أكبر ليّا ولأي شيء يقع تحتهم!
5 شهور مفيش خروجة بدون زن وصريخ بلا سبب، مفيش مكان في إيدي متعضش ومفيش عضاضة بترضيها، والمفاجأة إنه بعد ظهور السنّة الوضع مبقاش أحلى كتير.. لإنها بقيت عايزة تجرّبها في الرضاعة طبعًا!
 
فريدة بترضع طبيعي، ودي مأساة مع التسنين، متخيلين طبعًا كمية العض والتعاوير اللي بتسببها ليّا والصراخ مننا إحنا الاتنين، أنا من الوجع وهي من عدم فهمها ليه بصرخ الساعة 3 الفجر وأنا برضعها.. ده يدوب عضتني بطرف سنانها يعني، هزار خفيف كده على طريقتها! حل الموضوع ده كان إني أمنعها ترضع بعد ما تعض علشان أوصل لها إنها عملت حاجة غلط، بقية أضخ اللبن في ببرونة لغاية ما التشققات والالتهاب يقل شوية، وكمان الحلمة الواقية للثدي بتساعد على تقليل الاحتكاك كتير جدًا، مع كريمات الالتهابات الطبيعية.
 
ومع احتمالي لمرحلة العذاب دي، صاحبها تقلبات تانية في الأكل ورفض أكلات كانت بتحبها وشهيتها بقت غريبة جدًا، عايزة ترضع 24 ساعة أو بمعني أدق تفضل لازقة في صدري 24 ساعة، ولما سألت عرفت إن ده بيحسسها بالأمان والاحتواء، ويخفف ألم التسنين عندها في المرحلة دي، فبقيت أعمل شقلبظات علشان ترضى تاكل ونمزج حاجات مالهاش علاقة ببعض على بعض، زي البرتقال على صفار البيض، والبسكويت على شوربة الخضار، وهكذا.. وأصبحت يوم تاكل وتلاتة عايشة على الرضاعة، لكن بقول مرحلة وهتعدّي.
 
اقرئي أيضًا: بالصور.. 7 وصفات لوجبات خضار للرضع
 
الـ"بي بي" كمان اتحوّل، شوية أيام إسهال غريب، وشوية أيام كمان إمساك مزمن! الله طيب وبعدين.. التسنين هو السبب.
 
الفكرة إن المرحلة دي مستمرة معانا شوية حلوين، صحيح بعد كل سنة بتهدي نسبيًا لأيام قليلة، لكنها بترجع أشرس من الأول على الطفل والأم، مرحلة من أصعب مراحل تطور الطفل.. لكن هتهون وتعدي إن شاء الله.. دعواتكم تعدي بأقل خسائر ممكنة بس.
 
الـLevel القادم.. هو مرحلة الزحف ومحاولات القفز من على السرير والبحث عن كل شيء ممكن يؤذي بدنيًا زي وضع الصوابع في فيش الكهرباء وبين الأدراج! الخطر قادم.. انتظرونا.
 

عودة إلى منوعات

باسنت إبراهيم إبراهيم إبراهيم

بقلم/

باسنت إبراهيم إبراهيم إبراهيم

أتمنى أن أكون سوبر ماما، بعد أن أنجبت صغيرة جميلة فريدة عمرها شهور، أتعلم معها الصبر والأمومة وتلهمني بالعديد من الأفكار عن رعاية الرضع والاهتمام بهم مع عالم كامل من السهر والصبر الشديد.

موضوعات أخرى
supermama
Share via WhatsappWhatsapp IconSend In MessengerMessenger IconShare via FacebookFacebook Icon