حواديت ماما: يعني إيه فوتوسيشن؟

من فترة كبيرة لاحظنا إن مازن بيحب التصوير، وكل ما يكبر كان بيهتم أكتر وأكتر، لما نخرج ياخد التليفون ويبتدي يصور كل حاجة حواليه، ويتفرج ويمسح اللي مش عاجباه.

حد من الأصدقاء المصورين نصحوني نشتري له كاميرا "نصف محترفة" ودي ميزتها إنها شبه الكاميرات اللي شايلها المصورين، وبكده تدي له إحساس بالجدية وهو بيصور، وكمان إمكانياتها مناسبة لسنه.

وفعلًا الكاميرا كانت هدية عيد ميلاده الخامس، وساب عيد الميلاد وقعد يصور الحفلة، وطبعًا الصور كان فيها تركيز على الجزم والودان وغيرها من تفاصيل بشرية، هو كمصور سريالي كان مهتم بيها جدًا.

من كام يوم شافني بعمل موضوع عن اقتراحات وأفكار لعمل فوتوسيشن للسيدات الحوامل، وقال لي: "إيه ده يا سالي دول زيك عندهم بيبي في بطنهم، ليه متتصوريش زيهم كده؟".

قلت له "دول عاملين فوتوسيشن"، طبعا بعد صمت طويل، قال لي: "يعني ايه فوتوششن يا سالي؟".

قلت له "معناها جلسة تصوير، يعني المصور يقعد يصور الست مجموعة متنوعة من الصور، وهي بتعمل حاجات مختلفة وممكن تكون في أماكن مختلفة".

وبعدها بيومين، بص لي كده وقال لي: "يلا قومي البسي لبس خروج، وسرحي شعرك علشان أعمل لك فوتوششن، آه وما تنسيش تطلعي جزمة البيبي الصغننة".

وفعلًا اتصورت أحلى وأجدع فوتوششن على رأي مازن، فيها المهزوز وفيها البعيد، بس الأهم إن فيها حب، بصته وتعليماته ليا محسساني إنه فعلًا مصور محترف.

اجروا ورا شغف ولادكم، متستغربوش ومتكسلوش ومتستكتروش عليهم أحلامهم، دعمنا لأحلامهم ده الحاجة الوحيدة اللي ممكن تخليهم يحققوا أحلامهم.

اقرئي أيضًا: بالصور.. 10 أفكار لفوتوسيشن للحامل

العودة إلى منوعات