حواديت ماما: أول عيد ميلاد

أول عيد ميلاد

أول عيد ميلاد لابني

حبيبي سيف..

من سنة زي النهارده، الساعة 5 عصرًا وصلت أنت للدنيا، فاكرة تفاصيل اليوم ده وكأنه امبارح، الأيام عدت بسرعة قوي ودلوقتي بنحتفل بأول عيد ميلاد ليك.

الحقيقة إني الفترة الأخيرة وقعت في حيرة كبيرة بين رغبتي إنك تكبر وأبدأ أشوف ملامح شخصيتك، وأحلم أنك بتشاركني الكتب والورش والحفلات، وبين أمنيتي إني أوقف الزمن عشان أشبع منك ومن حضنك، لأني عارفة أنك في يوم هتكون أولوياتك لعب وجري واكتشاف عن أنك تفضل في حضني.

السنة الأولى كانت غنية بالتحديات، وعشان أكون صادقة معاك وبعيدًا عن أي كليشيهات، فأنا بعتبرها من أصعب سنين عمري لكن لا يمكن أتخيل حياتي من غيرك، وضحكتك وحدها كفيلة تنسيني أي إرهاق نفسي وجسماني.

النهارده أنت اتنقلت لمرحلة جديدة وشايفة محاولاتك أنك تسند نفسك وتمشي، وأنا فرحتي أكبر من أي شيء، لكن عايزاك تعرف إني هفضل سندك وقوتك زي ما دايمًا بقولك: "حبيبي ماما هنا، مفيش حاجة" وأنت تهدى وترتاح في حضني، وإني هافضل أكلمك واحكي لك الحكايات عشان نزور أماكن جديدة ونقابل ناس كتير في خيالنا.

كتير أسأل نفسي: "عمرك تخيلتي أنك تحبي حد كده؟" والإجابة هى أبدًا، أنت الوحيد اللي ممكن أعمل له أي شيء لراحته دون تفكير أو تردد، سواء أنا مرهقة أو مريضة، المهم دايمًا هو "أنت يا سيفو".

عدت السنة بكل الليالي الطويلة، قلة النوم والشيل والهز والقلق من أي أعراض جديدة، وأسئلة كتير والقراءة، السنة الأولى هى احتفال بنفسي كمان، مستغرب؟

أنا ممتنة لوجودك في حياتي، ولكل تغيير حصل في شخصيتي وقادرة أعرفه وأنت سببه، علمتني طول البال والصبر، إدراك أن كل مرحلة صعبة أو غير مفهومة لازم هيكون فيها الحلو، مفيش حاجة مستحيلة أو ملهاش حل، تقدير اللحظة الحالية من غير تفكير في ليلة إمبارح الطويلة، بكتب لك حكايات وبحلم بيوم ما هتقرا كل حاجة كتبتها عنك.

النهارده احتفال السنة هو احتفالنا إحنا الاتنين، ولأني حاولت واجتهدت حتى لو الصورة ناقصة حاجة أو إحساس التقصير ملازمني، فأنا عارفة سببه وهو إنك قلبي يا سيفو.

اقرئي أيضًا: حواديت ماما: ده آخرك ولا تقدري تعملي أكتر؟

عيد ميلاد الطفل الأول

ما تنسيش تحضري بدري لعيد ميلاد طفلك الأول ولو عايزة تعرفي أكتر عن تحضيرات عيد الميلاد، تعرفي على ترتيب حفلات عيد الميلاد لأبنائك من هذا المقال.

اقرئي أيضًا: أفكار جديدة لإعداد حفل عيد ميلاد طفلكِ في المنزل

ولو المشكلة في التوفير تعرفي على أفكار اقتصادية لجعل عيد ميلاد طفلك يوماً مميزًا.

عودة إلى منوعات

موضوعات أخرى
س
Share via WhatsappWhatsapp IconSend In MessengerMessenger IconShare via FacebookFacebook Icon
Share via FacebookFacebook IconShare via TwitterTwitter Icon