شاهدت لكِ: The Croods

منوعات

محتويات

    " خليكِ ماشي ورا النور، أوعي تستخبي، فكر و دور على بكرة و روحله".

     
    الجملة اللي فاتت دي مش كلامي، ده كان كلام واحد من أبطال فيلم The croods ، أو أول عائلة فى التاريخ.. لو بتحبوا أفلام الكارتون يبقي تعالوا أحكيلكم واحد من أروع أفلام الأنيميشن الحديثة.. جاهزين؟
     
    الفيلم بيبدأ بصوت "إيب" البطلة الصغيرة اللي بتحكي عن عائلتها المنتمية للعصر الحجري و الصعوبات اللي قابلت العائلة علشان تفضل على قيد الحياة، و قد إيه كان فى عائلات تانية ماتت لأنها واجهت خطر الخروج من الكهف و المجهول –حسب كلام والدها- لما الوحوش هاجمت العائلات دي قررت عائلة كروود أو "آل كروود" إنهم يستخبوا داخل كهف و يخرجوا بس كل كام يوم علشان يأكلوا أو يستحموا! المهم مفيش خروج بليل و مفيش تجارب جديدة ..أي جديد بالنسبة لعائلة كروود معناه موتهم!
     
    عائلة كروود مكونة من الأب "غروغ" و الأم "يوج" و الأخ "ثينك" و الأخت الصغيرة "ساندي" و الجدة "كران".
     
    عائلة من سكان الكهوف، ملابسهم و مواصفاتهم البدنية بتقول أنهم متوحشين بس الحقيقة أن مع بداية الفيلم هتبدأ تتعاطف معاهم جداً..
     
    الأب "غروغ" كل همه هو أنه يوفر الأمان و الحماية لعائلته لكن الأبنة "إيب" مراهقة متمردة عايزة تجرب كل جديد عايزة تخرج برة الكهف و تشوف النور .. لكن مع سيطرة الأب كل محاولتها بتفشل لغاية ما بيجي يوم و تتمرد تماماً.
     
    فى يوم بعد محاولة لإيب إنها تشوف الشمس، الأب غروغ بيعاقبها بدخول الكهف لكنها بتقلق أثناء نوم العائلة كلها على ضوء غريب برة الكهف و بتخرج لأول مرة لوحدها !
     
    بتتبع الضوء و بتكتشف مع أحداث الفيلم أن صاحب الضوء انسان متخفي فى قناع وحش و معاه عصاية فيها نار بتنور له، و دي بتبقي أول مرة تشوف فيها "إيب" النار و تتعرف عليها.
     
    و هنا بتبدأ أحداث المغامرات فى الفيلم، لمّا "إيب" بترجع الكهف و تحكي لعائلتها عن الشاب اللي قابلته و قالها أن قريب الأرض اللي فيها الكهف هتنهار ولازم يمشوا، و طبعاً عائلتها فى الأول مش بتصدقها لغاية ما بيحصل زلزال و تبدأ العائلة تجري وتتنقل و تبدأ إيب تدور تاني ع الشاب الشجاع الذكي "غاي" لغاية ما تلاقيه عن طريق صفارة معينة..
     
    "غاي" شاب ذكي و شجاع لأول مرة عرف عائلة كروود إن فى حاجة أسمها عقل و تفكير و أفكار ممكن تنقذهم مش بس القوة و الدراع.
     
    فى البداية آل كروود كانوا خايفين من "غاي" لكن مع الوقت حبوه ماعدا "غروغ" اللي حس بالغيرة من تعلق بنته و عائلته بـ"غاي" و توالت الأحداث الشيقة و الممتعة جداً ما بين الأثنين.
     
    و فى مرة غروغ و غاي وقعوا فى بحر من القطران و هنا اعترف غاي للأب غروغ بإن عائلته ماتت كلها فى البحر ده و أن مفيش عنده أفكار للنجاة، و لأول مرة الأب "غروغ" بيشجعه يفكر و فعلاً بينجوا من البحر و بيبقوا أصدقاء و بيقرروا يسافروا فى رحلة طويلة لمكان أمان كعائلة واحدة.
     
    بس الحقيقة أن مفيش مكان أمان على طول.. و إن علشان يعيشوا لازم يتنقلوا و يفكروا و يطوروا نفسهم..و يستخدموا عقلهم فى التفكير.
     
    و ده اللي عرفته عائلة كروود فى النهاية.
     
    الفيلم بيحمل دروس كتير أوي أهمها:
    1-أن الخوف من التجربة بيقتل الإبداع و الابتكار فى الأطفال و الكبار.
    2-لازم تعترف للناس اللي بتحبها بحبك و تقديرك ليهم قبل ما يجي وقت و فجأة تحصل حاجة تبعدك عنهم.
    3-اسمعوا و اتكلموا مع أطفالكم ..و تجنبوا الأوامر بدون نقاش.
    4-فكروا ..اعتمدوا دائماً على التفكير قبل أي شئ، القوة قوة عقل ثم قوة بدنية.
    5-كل شئ قابل للتغير و التطور طالما فى إرادة.
    6-بكرة صحيح فى علم الغيب بس بدون عمل ومجهود مش هنقدر نخليه أحلي.
    7-غيروا وجهة نظركم للأشياء و هتتغير للأفضل.
    8-متحكمش على حد من مظهره أو طريقة كلامه بدون ما تعرفه كويس.
     
    الفيلم بيأكد فى كل مشهد على معني التضحية و العائلة و التخلي عن الأنانية و أهمية التفكير و الابتكار، فى أكثر من درس و عبرة مع كل موقف بين الأبطال بالإضافة لتقنية الـ 3D اللي بتعطي احساس بإنك عايش جوه أحداث الفيلم بجد.. أتمنالكم مشاهدة ممتعة مع أطفالكم.
     

    إعلان الفيلم

    موضوعات أخرى
    التعليقات