قبل الولادة بيوم كنت في المستشفى، برتب إجراءات الولادة مع مساعد الدكتور، وبما إن حالتي كانت صعبة واحتاجت لمتابعة دقيقة طول فترة الحمل، الدكتور المساعد حاول إنه يطمنني لكل اللي هيحصل بعد الولادة القيصرية وقال لي بمنتهى الثقة و الهدوء: "عايزك تهدي أعصابك تمامًا والدكتور فعلًا بيهتم بكل التفاصيل خلال الولادة لدرجة إنه بيحمي المريض بنفسه" لحظتها قلت لنفسي "أكيد طبعًا هيحموا البيبي إيه الجديد يعني؟!".
التخدير في الولادة القيصرية
الحقيقة إن قلقي وخوفي كانوا أكبر من إني أركز في تفاصيل كلام الدكتور المساعد والليلة مرت من غير نوم، لأن تفكيري مشغول وخايفة جدًا، بدأت الاستعداد للولادة وبدأت قراءة كل السور والآيات القرآنية والأدعية "يا رب هوّن يا رب يوصل بالسلامة".
دكتور التخدير خيرني بين البنج الكلي أو النصفي، وأنا طلبت النصفي، لأني عايزة أشوف البيبي لحظة وصوله، وبدأ يشرح إجراءات حقنة الإيبديروال، وبعد ثواني بدأت أشعر بالتخدير التام بالجزء السفلي من جسمي.
التخدير النصفي في الولادة القيصرية
بعد الولادة القيصرية
استمريت في الدعاء والدكتور طمأنني وبدأنا الولادة، عيني وقعت على النور واكتشفت إن فيه مرآة عاكسة، لحظتها حوّلت نظري تمامًا، الدكتور كان بيشرح لمساعديه حالتي وحقن السيولة و كل ما هو جديد طبيًا.
بعد ساعة تقريبًا سمعت صوت ابني لأول مرة، والدكتور بكل فرحة، قال: "الحمد الله شرف بالسلامة"، وبمجرد ما شفته سألت الممرضة: "هو مغمض عين واحدة ليه؟"، ضحكت وقالت لي: "على ما توصلي الأوضة يكون فتح الاتنين".
أعصابي بدأت تهدى وفجأة، سمعت الدكتور بيقول: "يلا نضافة"، وقبل ما أفكر كتير، لقيت المساعدين بدأوا تنظيف جسمي بالكامل باستخدام إسفنج مبلول، للحظات بدأت أدرك كلام الدكتور المساعد "إنه بيحمي المريض بنفسه"، وكنت في موقف محرج حقيقي، لا قادرة أتكلم ولا أتحرك لأني مخدرة، واستمرت حملة النضافة لدقائق مرت عليا ساعات، حسيت وقتها بإحساس الضفدع المحاصر وطلبة طب بيحاولوا إجراء التجربة عليه، وكل ما في بالي: "لا لا أنا أكيد بتخيل.. لا أنا عمر ما حد شافني كده حضرتك!".
أعراض ما بعد الولادة القيصرية
عاوزة أقولك برضه عن شوية معلومات عن الأعراض اللي ممكن تمري بها بعد الولادة القيصرية زي مثلًا:
- هتحسي بألم في منطقة الجرح، والألم ممكن يستمر لأسبوعين أو أكثر حسب حالتك النفسية والجسدية.
- كمان الجرح هيأخذ وقت لغاية ما يلتئم بالكامل، ممكن الفترة دي تكون شهر أو شهر ونصف مثلًا.
- هتلاحظي صعوبة في الحركة والمشي خلال اليومين اللي بعد العملية، علشان كده لازم كون فيه حد من اللي بتحبيهم جنبك دائمًا على الأقل لمدة 3 أيام.
- ممكن تحصللك التهابات في مكان الجرح لو مش مقفول كويس، وممكن الالتهابات تكون في المثانة ومجرى البول كمان.
- لو متمشيتيش واتحركتي كويس في الأيام اللي بعد العملية للأسف ممكن يحصللك جلطات دموية، على الرغم إن الحركة صعبة لكن لازم تتحركي علشان الجرح يلم وترجعي لطبيعتك.
غرفة الإفاقة
بعد النضافة ووضعي في غرفة الإفاقة، قلت: "خلاص خلصت من المواقف المحرجة"، لكن قطع تفكيري دكتور متدرب، وهو بيقول لزميله: "أنا هركب قسطرة هنا تعالى شوف"، حسيت يومها إني مستباحة حقيقي لكل الناس، وفعلًا ركب القسطرة بعد تعليق: "محتاجين حد ينضف الدم هنا بسرعة، في كمية كبيرة"، وأنا رافضة أتخيل المنظر والتشبيه.
12 نصيحة للعناية بجرح الولادة القيصرية
المواقف المحرجة يوم الولادة وبعدها كتير ودايما أقنع نفسي "مش هيشوفوني تاني إن شاء الله"، يمكن نوع من تهوين الأمر على نفسي، وتفضل حكاية "يلا نضافة" أفتكرها من وقت للتاني وأهرب منها إني كنت في عملية والموقف مَر بسلام.
