حواديت ماما: مغامرات فريدة والقط

    تسلية

    خلال حملي في فريدة، الدكتور طلب مني الابتعاد عن التعامل مع القطط، خوفًا من أي عدوى أو حساسية، لأن مناعتي كانت تحت الصفر، الحقيقة وقتها اتضايقت جدًا من التعليمات دي، خصوصًا وأنا معروف عني تربيتي للقطط وحبي ليهم والتعامل معاهم من يوم ما اتولدت، معقول بقى يوم ما أكون حامل أتخلي عنهم بالبساطة دي؟!

    وقد كان.. مرّت شهور الحمل على خير، وصلت فريدة بالسلامة، وفي نفس التوقيت وصلنا قطة صغيرة جدًا وجميلة جدًا، كنت أنا لسّه بعاني من حالة اكتئاب بسبب بُعد قططي عني، وكنت رافضة تربية أي حيوان أليف تاني، لأني مش عايزة أتعلق بيهم وفجأة يمشوا لأي سبب.. ولفترة كبيرة فضلت أتعامل مع القطة الجديدة بحذر، وفضلت أبعد فريدة قدر الإمكان عن القطط وعالمهم.

    مرّت شوية شهور كمان وفريدة بدأت تزحف وإدراكها ومهاراتها تطور، كان وقتها جالنا قط تاني صغير، قمة في الشقاوة والجمال، ومن هنا نشأت صداقة عميقة جدًا جدًا بين فريدة والقط.. لدرجة إن تالت كلمة فريدة تنطقها كانت "قطة"!

    اقرئي أيضًا: قائمة بالحيوانات الأليفة الآمنة لأطفالك

    إمممم.. تفتكروا دي جينات وراثية مثلًا؟

    يوم وراء التاني، كانت فريدة بتتعامل مع القط على إنهم نفس المخلوق، هما الاتنين بيزحفوا ويتنططوا ويطلعوا أصوات غير مفهومة، في الأول كانت بتتعامل معاه بعنف، لأنها مش فاهمة، بهدوء علمتها إزاي تمسكه وإزاي تلعب معاه بدون ما تأذيه، حاليًا لو حد زعق للقط أو شاله بطريقة غلط، فريدة بتضايق وممكن تعيط وتعبر عن غضبها وخوفها عليه.

    وفي المقابل، القط بقى زي ضلها، ماشي وراها، نايم تحت رجليها، بيعلمها تزحف وبيمشي جنبها "تاتا.. تاتا" لما تقرر تاخد كام خطوة، لو فريدة عيطت أو زعقت لها، بيجي يتنطط ويعبر عن زعله عندي، لأنهم أصحاب.

    اقرئي أيضًا: تربية الحيوانات الأليفة وصحة الأطفال

    ساعات بقول هو ده صح؟ إنها تتعلق بحيوان أليف وتكبر بتتعامل معاه بتلقائية كده؟ 

    بالنسبة ليّ تربية القطط كانت أكتر شيء ممتع في الحياة، تعلم مسؤولية وصديق وفي وشقي وعاشق للعب، والدتي بتقولي دايمًا إن القط هيعلمها كتير، وكل ما تكبر مهارتها هتطور أكتر من التعامل مع الحيوانات الصغيرة، والأهم هيزرع جواها المسؤولية والحنية كمان.

    طبعًا الصداقة الحلوة دي لا تخلو من المناكفات، يعني مثلًا فريدة تدلق للقط الميه على الأكل، القط في المقابل ياخد لعبتها يخبيها، وهكذا مغامرات توم وجيري، للحظة حسيت إن عندي طفلين مش طفلة واحدة وقط صغير.

    عمومًا.. على قد محاولاتي لمنع فريدة عن عالم القطط، على قد ما حصل العكس، والجينات الوراثية طغت على محاولاتي، وها أنا أعيش مغامرات فريدة والقط يوميًا.

    عودة إلى منوعات

    باسنت إبراهيم إبراهيم إبراهيم

    بقلم/

    باسنت إبراهيم إبراهيم إبراهيم

    أتمنى أن أكون سوبر ماما، بعد أن أنجبت صغيرة جميلة فريدة عمرها شهور، أتعلم معها الصبر والأمومة وتلهمني بالعديد من الأفكار عن رعاية الرضع والاهتمام بهم مع عالم كامل من السهر والصبر الشديد.

    موضوعات أخرى
    J&J KSA
    Share via WhatsappWhatsapp IconSend In MessengerMessenger IconShare via FacebookFacebook Icon