كنا قاعدين في أمان الله، أسرة سعيدة هانئة من أب وأم وقردتين (أقصد طفلتين)، بنشوف التلفزيون وناكل فشار، وفجأة قطع الهدوء و السلام ده صوت صريخ بنتي مرمر(5 سنين) وهي بتعافر وتحاول تشد صباعها المسكين من بق أختها كركر (سنة ونص بس مفترية). وبعد محاولات مضنية ومستميتة وشد وجذب، عرفنا أخيرًا نخرج الصباع سليم من بقها الحمد لله. بس مرمر قعدت تعيط كتير كتير، وتقولي "عضتني يا ماما.. عاقبيها يا ماما".
اقرئي أيضًا: حواديت ماما: 5 سنين ومكملين
حاولت أشرح لها وأقولها:
- يا مرمر دي بيبي لسة ومش فاهمة.
-لا يا ماما دي فاهمة وبتستبعط (قصدها بتستعبط).
-يا مرمر ما تقصدش.
-لا قاصدة.
-يا مرمر أختك وبتحبك والله بس هي مفترية.
-لا ما بتحبنيش دي جاية عشان تاكل صوابعي.
مرمر كانت حاسة بشيء من الظلم لأنها بتتعاقب لما تغلط و السفروتة دي بتفلت ببلطجتها، فجأة باباها قالها خلاص يا مرمر هعضهالك، وفتح بقه ومسك صباع كركر الصغنن، وعمل نفسه هيعضها، وفجأة لقينا بووووووووووووووم.
مرمر فطت من على الكنبة وزقت باباها بعيد وقالت له:
- ما تعضيش أختي أبدًا! أنا هفضل أدافع عنها دايمًا حتى لو هي مفترية وبتعضني!
