حكايات سوبرماما: الكبسة الكبيرة

منوعات

محتويات

    صباح الخير يا ماميز، فاكرين اﻷسبوع اللي فات حكايتي معاكم، فاكرين تحضيراتي و أحلامي و أمالي و ابتساماتي بمناسبة عيد الحب؟
    يُسعدني أنا مدام سوبرماما أن أحكي لكم عن "الكبسة الكبيرة".
     
    الزمان: 14 فبراير الساعة 10 مساءً
    المكان: بيتي الجميل 
    الحدث: كان "احتفال صغنن بعيد الحب"
     
    اليوم بدأ زي ما كنت مخططة كويس جداً، الولاد رجعوا علي جدتهم بعد المدرسة، بينما أبو العيال في الشغل عادي و أنا حضرت البيت دباديب و قلوب و بلالين أحمر في روز في أبيض.
    نزلت الكوافير علشان أظبط اللمسات النهائية، و حضرت أحلي عشاء ممكن تتخيلوه و طبعاً الهدية التمام.
    وفضلت مستنية اللحظة اللي يوصل فيها أبو العيال و ينبهر و يندهش و يتفاجئ بكل التحضيرات دي.
    جرس الباب رن .. وانا بفتح الباب و دقات قلبي بتجري و را بعضها..وعلى وشي ابتسامة رضا و ترقب..ترتاتاتاتااا
     
    دخل زوجي و في  إيده وردة حمراء و دي كانت بداية مُبشرة -متفرحوش أوي دلوقتي هتعرفوا ليه-.
    فاكرين اﻹعلان بتاع الشوكولاتة اياها، أيوان بالظبط هو ده كان رد فعل زوجي تجاه ديكور الشقة و اﻷحمر x أحمر اللي أنا عاملاه....."ولا أااي إندهاشة"
    بلعت الصدمة الأولي و قولت يمكن بيكمل تمويه، المهم الوردة اللي بالمناسبة سابها علي السفرة و دخل الحمام..
    حضرت العشا و الشموع .. ولسان حالي بيقول "ها وبعدين" . وهنا قررت أسأله بقا أو ألفت نظره بأي حاجة.. بس هو كان منهمك تماماً في اﻷكل.
     
    بعد العشا لبست اللبس التمام زي ما أنتوا شايفين، حضرت كيكة ع السفرة، حضرت الهدية .. وبدات أسأله وهو منهمك في قراية الجرنال
     
    • حبيبي مش واخد بالك من حاجة إنهاردة؟
    • رد: آه اﻷكل كان طعمه حلو أوي تسلم إيدك
    • حبيبي طيب ايه رأيك في النيولوك الجديد بتاعي؟
    • رد: -بعد نظرة سريعة- آه كويس ، بس أنتِ مش بردانة؟
    • رديت : إيــــــه! -صدمة رقم 2-
    • كمل كلامه : فين الولاد صحيح مال البيت كدة هادي ومفيش حس؟
    • ﻷ يا روحي -هنا كانت روحي في مناخيري فعلاً- الولاد عند ماما إنهاردة.
    • رد :ممممم .طيب
    • كملت كلامي: يعني أنتِ مش واخد بالك خالص من أي حاجة إنهاردة شوف طيب تاريخ اليوم في الجرنال!!!
    • رد: عادي يا حبيبتي.
    • طيب ايه الوردة الحمرا اللي جايبها دي، متهزرش بقا أكيد دي ليا صح؟
    • رد -بإندهاش-: دي من عم سعيد بتاع الورد اللي على أول الشارع بيوزعهم ع الناس معرفش ليه إنهاردة، بس هو إدهالي و قالي كل سنة وانت طيب يا باشمهندس فمرضتش أكسفه!!! وهنا قولت في سري " طبعاً تكسفه ليه لما ممكن تكسفني أنا"
    • عموماً متغلاش عليكي أكيد..قوليلي، تعرفي أكلة من 4 حروف أول حرف منهم "كاف"؟!
    • طبعاً يا حبيبي "كبـــــــسة"
    ................
    حد لسة مستني يعرف إيه اللي حصل بعد كدة؟! في الحقيقة أنا كل اللي فاكراه أن عيني زغللت مقدرتش أستحمل الكبسات دي كلها ورا بعض و محستش بأي حاجة غير تاني يوم الصبح وولادي بيصحوني علشان أحضرلهم الفطار.
    أما زوجي العزيز فأعتبر أن الهدية بمناسبة عيد الثورة و قال "يا واد طنش خاااااالص"..كل سنة وأنتم طيبين.
     
    كاريكاتير/ إنجي سامح
     

    عودة إلى منوعات

    موضوعات أخرى
    رسائل من الجنين إلى الأم خلال أشهر الحمل التسعة
    Share via WhatsappWhatsapp IconSend In MessengerMessenger IconShare via FacebookFacebook Icon
    Share via FacebookFacebook IconShare via TwitterTwitter Icon