نونو في السكة: حكايات لأول مرة

محتويات

    مساء الفل عليكم يا ماميز، زي ما حكيتلكم المرة اللي فاتت إن أبرز حدث يخص رحلة الحمل مؤخرًا كان معرفة نوع الجنين، ودلوقتي أنا في النصف التاني من الرحلة، يُقال إنه أحسن فترة في الحمل وبيسموها كمان فترة -شهر عسل الحمل- حيث إن الأعراض المزعجة بتقل وتحتفي..

    بس ده مش معناه إن مفيش أعراض جديدة بتظهر، ولا إيه؟ 

    في الشهور الوسطي بدأت معايا  وجع الضهر يزيد خصوصَا لو وقفت فترة أو نزلت وطلعت سلالم كتير، وصعوبة النوم بسبب زيارات الحمام، والحموضة اللي بتزورني على دوريات لكن في نفس الوقت دي أهم شهور لتناول الأكل الصحي خاصة الحديد والكالسيوم علشان نمو عظام وجسم الجنين بسلام.

    الخبر الكويس هنا إن الدكتور كتب لي بعض المسكنات اللي ينفع استخدمها ولإني كائن موسوس جدًا فلسة عندي خوف من أي أدوية طالما أقدر استحمل الوجع وطالما في بديل طبيعي.. غالبًا البديل الطبيعي هو الراحة حاليًا.

    ليه بقي بالنسبة لي دي شهور المفاجأت وحاجات بتحصلي لأول مرة؟

    بطني بدأت تكبر أو خلينا نقول تظهر، ده كان حدث عظيم خلاّني اقتنع إن في مخلوق بيكبر جوا بطني بجد.. شكلي بيتغبر إلي حدما لشكل المامي الحامل.

    أول مرة أحس بحركة النونة! عمومًا ده إحساس غريب جدًا كنت مستنياه بفارغ الصبر وعماله أقرا عنه وإزاي بيحصل وإمتي و و و..بس الحقيقة أول مرة حسيت بحركتها كانت مفاجأة وعرفت لوحدي إن دي حركة النونة مش غازات ولا لخبطة أكل.. هي حاجة كدة متتوصفش مهما تقري إنها زي حركة الفراشة ولا نبش الفراخ ولا سمكة بتعوم -أنا مكنتش بفهم الحقيقة يعني الأوصاف دي لإني مش حامل في فراشة أو سمكة وأكيد مش فرخة!- بس هي حركة بتبدأ خفيفة وبسيطة جدًا اشبه لنبضات القلب بشكل كبير وبتزيد كل ما بتتقدمي في أسابيع حملك والبيبي يزيد في الحجم وقوة العضلات.

    مع الوقت الحركة هتبقي لها زي روتين كدة ثابت كذا يوم، مثلاً أول ما كنت بهيئ نفسي للنوم وتبقي الدنيا هادية تبدأ النونة تتحرك وغالبًا ده بيحصل بليل، غير فترات النهار والوقت إللي بكون في الشغل أو مشغولة بأي حاجة..وقتها مش بحس أو مش بكون مركزة مع حركتها..

    لما بأكل حاجات مسكرة، أو تكون جنبي دوشة كبيرة، دي من الحالات اللي لاحظت فيها برضو حركات البيبي.. عمومًا الدكتور بيقول إن لحد نهاية الشهر السابع الحركات بتبقي قوية وملحوظة، وكل ما معاد الولادة بيقرب كل ما الحركات بتقل لإن المساحة حوالين الجنين بتقل وبتضيق شوية بشوية وكمان بيكون عمل لنفسه فترات نوم وروتين على مدار اليوم زيينا بالظبط -سبحان الله-.

    موضوع حركة الجنين دي أصبني بهوس إن كل شوية احط ايدي على بطني واستناها تتحرك، واقلق جدًا لو عدت كام ساعة محستش بأي حركة، عرفت بعد كدة إن ده طبيعي خاصة في أول الشهور الوسطي لإن حجم الجنين بيكون لسة صغير.. لكن طبعًا متعة الاكتشاف والتواصل مع الجنين كانت حاجة سحرية بالنسبة لي عايزة اقعد احسها على طول....

    في المرحلة دي فعليًا غالبًا الحامل بتحس إنها أم..بتحس أوي بمشاعر الأمومة لأول مرة أكتر من بداية الحمل.. يمكن علشان التواصل بيزيد بينها وبين جنين بيكبر جواها، ده اللي بيحصل معايا حاليًا، بقيت بفكر في الشهور الجاية شكل حياتي هيكون إزاي وأنا شايفة النونة -إن شاء الله- هي محور ترتيب كل شئ، بدأت أتفهم أوي قلق ولدتي وخوفها عليّ وعلى إخواتي، بدأت أدور على ورش ودورات تدريبية عن الولادة والرضاعة والتعامل مع حديثي الولادة.

    في الفترة دي بدأت اقرا أكتر عن كل ما يتعلق بالولادة علشان أقرر وأنا مقتنعة الطريقة المريحة لي، أول مرة شوفت فيديو عن طرق الولادة الطبيعي والقيصري، مكنتش خايفة على قد ما كنت مذهولة، الولادة دي معجزة مش حدث بيحصل ويعدي بسرعة كدة لأ خالص..بغض النظر عن الألم الجسدي والنفسي لكنها أكيد تجربة تستاهل.

    نسيت أقولكم إني طبعًا بقابل يوميًا ناس من نوعية " هو إنتي لسة شوفتي حاجة"، لسة لما تولدي، يابنتي خليها جوه أحسن.. وكإني بمزاجي.. بس عمومًا الناس دي حدوتة تانية هاحكيلكم عنها بالتفصيل الأسبوع الجاي.

    عودة إلى الحمل

    موضوعات أخرى
    س
    Share via WhatsappWhatsapp IconSend In MessengerMessenger IconShare via FacebookFacebook Icon
    Share via FacebookFacebook IconShare via TwitterTwitter Icon