أفضل مطاعم الأكل البيتي للعزومات

عندك عزومة كبيرة ومحتارة في أصناف الأكل، والوقت غير كافي إنك تطبخي جميع الأكلات لوحدك؟ النهارده بنقدملك تقرير بأفضل مطاعم الأكلات البيتي؛ للاستعانة بها في عزوماتك وحفلاتك وإنتي مطمنة من جودة الأكل وكذلك التكلفة المناسبة.

 

مطعم الشيف سرحان:

مطاعم الشيف سرحان هي سلسلة مطاعم شرقية موجودة بمختلف أنحاء الجمهورية، المطعم بيقدم مختلف الأكلات الشرقية، زي الحمام المحشي والمحاشي، العجول والخراف المشوية والطواجن، مختلف أنواع الأرز العربي، البط ولحم الماعز، بالإضافة إنه مشهور بجودة مشوياته وأسعاره المناسبة.

 

لو عايزة عزومة مميزة يغلب عليها المشويات أو عندك عقيقة تقدري تستعيني بمطبخ الشيف سرحان خاصة بفروعه المنتشرة في القاهرة (المعادي، الرحاب، المفطم، مدينة نصر ومصر الجديدة). 

شوفي موقع الشيف سرحان لمعرفة المنيو وتحديد ميزانية العزومة ولأي استفسارات أخرى: http://chefsarhan.com/en/

 

مطعم أم حسن:

من المطاعم الشهيرة بالأكل البيتي، باين من اسمه، الفرع الرئيسي في مدينة نصر وحاليًا فيه فرع كبير في المعادي.

مطبخ أم حسن مشهور بالأكلات المصرية الأصيلة، زي الفتة والبط المحشي والملوخية باللحم والفطير المشلتت وغيرها من أطباق المحمر والمشوي والطواجن.

أكل أم حسن له طابع بيتي تمامًا، علشان كده هو مناسب لعزومة منزلية للعائلة، العيب الوحيد إن فروعه محدودة، لكن خدمة الدليفري ممكن تحل المشكلة دي.

شوفي صفحة مطعم أم حسن والمنيو على صفحتهم بالفيسبوك: https://www.facebook.com/OmHassan.Egypt

 

مطبخ الست أمينة

وده بقى مطعم رائع في المعادي فقط، لكن التوصيل لمختلف أنحاء الجمهورية، المفاجأة إن التوصيل مواعيده مظبوطة جدًا، مهما كانت كمية العزومة أو الأصناف المطلوبة، الدقة والمذاق الشهي هما سبب شهرة مطبخ الست أمينة. بالإضافة إنه بيجمع بين الأطباق الشرقية المعروفة والأطباق الجديدة زي الشيش طاووق والمشويات.

مطبخ الست أمينة مشهور جدًا بالمحاشي البيتي وأطباق الحلويات والمقبلات اللي أنواعها كتير جدًا في المنيو، المطعم ده اختيار مثالي لو عايزة عزومة كاملة متكاملة من الأول للآخر، يعني من أول الأطباق الرئيسية مروراً بالحلويات وحتي السلطة.. بأسعار مناسبة.

المطعم مناسب لمختلف أنواع العزومات.

شوفي منيو الست أمينة على صفحة المطبخ: :https://www.facebook.com/ElSetAminaKitchen

 

بدوية

أي حد زار سيتي ستارز أكيد قابل مطعم بدوية، المشهور بالأكل البيتي العربي، زي الكبسة بأنواعها والطواجن والمشويات بالإضافة للطواجن.

المطعم ممكن يكون أغلى في الأسعار، لكنه في النهاية بيقدم جودة وكمية أكل مناسبة للسعر، والتوصيل بيحل مشكلة الفرع الواحد.

منيو مطعم بدوية وتفاصيل زيادة على صفحتهم بالفيسبوك: https://www.facebook.com/Badaweya.Egypt

 

أكل بيتي

اسم المطعم "أكل بيتي"، مطعم في المعادي الجديدة، طبعًا واضح من الاسم إنه متخصص في الأكلات البيتي المصرية والشرقية.

المطعم بيوصل لمختلف أنحاء الجمهورية والأكلات طعمها فعلاُ بيتي، بتوصل سخنة وفي معادها بالإضافة لوجود منيو للحلويات وأسعار مناسبة جدًا.

المطعم له منيو متنوع لكن لو عزومة متزدش عن 6 أفرد هيكون مناسب جدًا، كمان ركزي في المنيو على الأطباق الرئيسية؛ لأنها الأعلى جودة ومذاق مقارنة بالمقبلات والشوربة.

شوفي منيو أكل بيتي: http://www.menuegypt.com/Akl- Beety

(اقرأي أيضًا: 7 وصفات أكلات شهية للعزومات)

 

ودلوقتي معاد المفاجأت، أنا بسميها عزومات الدلع، وهي خاصة بمحلات انضمت مؤخرًا لعالم الكاترينج والعزومات البيتي الشهية زي:

لابوار ولوكرنفال.

لابوار: محل الحلوى الشهير بيقدم منيو خاص للعزومات، غالي شوية لأن الفرد بيكون بحوالي 200 جنيه، المنيو حسب الطلب، يعني لو عايزاه طواجن ورومي وأرز بالخلطة هيجيلك كده، لو عايزة مشويات ومقبلات هيكون كده.. المهم في الآخر إن فعلاً الأكل طعمه لذيذ، وبيجي في معاده مظبوط، ولأنها عزومات بالطلب فلازم تتفقي مع المحل قبل العزومة بفترة كافية لتحضير الأكلات.
 
لو كرنفال: محل الحلويات اللذيذ بيقدم منيو غداء وأصناف حادقة متنوعة، وطبعًا بيقارب في تكلفته لابوار أو أغلى كمان، جودة الأكل عالية والأصناف متنوعة.
 

وأخيرًا، لو جربتي مطعم بيتي شاركينا برأيك، ولو صاحبتك بتدور على مطعم لعزومة حلوة share معاها المقال ومستنيين رأيكم!

(اقرئي أيضًا: دليل سوبرماما للتجهيز للعزومات)

عودة إلى بيت

باسنت إبراهيم

بقلم/

باسنت إبراهيم

أتمنى أن أكون سوبر ماما، بعد أن أنجبت صغيرة جميلة فريدة عمرها شهور، أتعلم معها الصبر والأمومة وتلهمني بالعديد من الأفكار عن رعاية الرضع والاهتمام بهم مع عالم كامل من السهر والصبر الشديد.

موضوعات أخرى
علامات تخبرك بحب زوجك لكِ
Share via WhatsappWhatsapp IconSend In MessengerMessenger IconShare via FacebookFacebook Icon