"خلي بالك يا سالي انتي كده قاعدة على شكبكة".. دي كانت الجملة الأولى اللي خلتني أبص شمال ويمين وأقول "بسم الله الرحمن الرحيم.. مين شكبكة ده؟".
البداية كانت لمّا مازن بدأ يطلب من باباه أنه يجيب له أخ، وهو رايح يلعب معاه.. كنا بنضحك ونتريق ونقله هنجيب لك أخ من السوبرماركت حاضر.
بعد ما مازن زهق قرر إنه يخلق أصدقاء يلعبوا معاه، وفجأة ظهر "شكبكة" في حياتنا، شكبكة هو المسؤول عن اللعب اللي بتتكسر، وكل الشقاوة اللي بتحصل في البيت.
الحقيقة، في البداية خفت لأن "شكبكة" واخد راحته في البيت بياكل ويشرب وبيتشاقى، وبيتخانق كمان مع مازن ومش بيسمع الكلام، بس بعد البحث عرفت إن الصديق الخيالي مهم جدًا للأطفال.
في بريطانيا مثلًا عملوا دراسة عن الأطفال والصديق الخيالي على 1446 بيت فيه أطفال، ولقوا إن في طفل واحد كل 5 أطفال عنده صديق خيالي.
اقرئي أيضًا: الصديق الخيالي للطفل
"شكبكة" كائن صغير جدًا مازن بيحطه في جيبه وإحنا خارجين، وساعات بيحطه في شنطته وهو رايح المدرسة، مازن قال لي في مرة إنه شقي جدًا وعنده عين واحدة!
بس يا ريت الموضوع وقف لحد هنا، مازن طفل بيحب اللمة، فمع شكبكة ربنا بعت لنا كمان "أخ" له، صديق تاني لا يُرى بالعين المجردة، وهو الشخص المثالي المؤدب اللي مبيعملش شقاوة، ودايمًا بينتقد "شكبكة"، يعني مازن عمل لمة وشلة خيالية، وموقفش لغاية هنا وبس، ده كمان جوّز "شكبكة" للأستاذة "شكبتتي"، وهي بنت جميلة بس عندها عينتين اتنين، مش واحدة بس زي "شكبكة" الغلبان اللي بيتحاسب على كل شقاوة مازن.
يجي مازن وهو بيحاول يعمل نفسه متعصب ويقول لي "شفتي شكبكة عمل إيه؟" أعرف على طول إن في مصيبة، ويطلع في لعبة اتكسرت، أو كورة اتحدفت من الشباك، وطبعًا المسؤول هو "شكبكة"، ومازن وأخ حاولوا يمنعوه بس هو مبيسمعش الكلام!
اقرئي أيضًا: أهمية تنمية حس الخيل لدى الأطفال
الحقيقة إن وجود صديق وهمي أو خيالي بينمي قدرة الطفل على التمثيل والحكي، وطبعًا الخيال، لأن مازن دايمًا بيعمل حوارات درامية متكاملة بينه وبين أصدقائه التلاتة، ولو مازن قرر في يوم يتخلى عن "شكبكة" و"أخ" و"شكبتتي"، أنا اللي هفتقدهم جدًا، لأنهم بقوا زي ولادي!
