بالصور: طفلة مريضة بالسرطان تتحول لأميرة من أميرات ديزني

ايزابيلا1

إبزابيلا هارفي، طفلة جميلة عمرها 5 سنين، وهي عمرها 3 سنين أُصيبت بلوكيميا الدم والمرض هاجمها تاني وبدأت علاج الكماوي، شعرها بدأ يتساقط مع زيادة جرعات العلاج، وحسب كلام والدتها بدأت تفقد الثقة في نفسها كطفلة..وأصبحت القبعة جزء من مظهر إيزابيلا الجميلة.

وزي كل الأطفال كانت إيزابيلا بتحب أميرات ديزني، لكن مع تساقط شعرها بسبب السرطان، إيزابيلا حست إنها خلاص مبقيتش أميرة زيهم ولا بقيت شبه أميرتها المفضلة "سندريلا"، لإن سندريلا مش  بتلبس قبعة على راسها..

وهنا لاحظت أمها إن إيزابيلا بدأت تنطوي وتحس بالحزن وإنها مش طفلة جميلة زي بقية الأطفال.

لكن الحقيقة، إن إيزابيلا طفلة أميرة وأجمل من كل أميرات الحواديت.. علشان كدة، والدتها حققت لها حلم من أحلامها بالاشتراك مع جميعة لرعاية مرضي السرطان في نيويورك اسمها  Gianna Nicole's Heart of Hope، الجمعية نظمت جلسة تصوير قامت بها المصورة "هوبارد" الخاصة بالجمعية، وفكرة جلسة التصوير كانت عبارة عن تجسيد شخصية سندريلا المفضلة لإيزابيلا ولكن بطريقة مختلفة جدًا. وفي نفس الوقت صممت والدة إيزابيلا ملابس سندريلا التنكرية لطفلتها بالاشتراك مع جمعية أخري لتصميم ملابس الأطفال.

إيزابيلا أول ما وصلت مكان التصوير، كان خايفة ومش واثقة إنها ممكن تتصور بملابس سندريلا والأهم كانت رافضة تخلع القبعة نهائي ومكسوفة، لكن كل ده اتغير أول ما شافت المصورة هوبارد وهي في زي سندريلا، لكن سندريلا بتاج على راسها بدون شعر أو قبعة..

وهنا أنطلقت إيزابيلا وطارت من السعادة  وقالت "دلوقتي بس ممكن اتصور مع سندريلا لإنها شبهي"

ودلوقتي هاسيبكم مع صور إيزابيلا الجميلة مع أخواتها والمصورة الرائعة.

إيزابيلا2

إيزابيلا3

إيزابيلا4

إيزابيلا5

إيزابيلا6

إيزابيلا7