حواديت ماما: كسوة الشتاء

    تسلية

    حان الآن موعد ترتيب الدولاب ونزول الملابس الشتوية والخريفية التقيلة، وصعود ملابس الصيف الحلوة الخفيفة الملونة، كل سنة وإنتم طيبين وبعودة الأيام.. وفي مثل هذه الأيام من كل عام بتبدأ رحلة فرز الملابس وإيه هيكمل معانا الشتاء ده وإيه لأ..

    كوني أم لطفلة عمرها سنة وكام شهر، فالحقيقة لسّة معنديش معاناة الأمهات اللي أطفالهم أكبر سنًا وعندهم أكثر من طفل، لكن في نفس الوقت كل ملابس فريدة الشتوية الخاصة بالسنة اللي فاتت مش مناسبة ليها السنة دي، لأن الأطفال بيكبروا بسرعة جدًا في السن ده، وطبعًا حدث ولا حرج عن أسعار ملابس الأطفال الشتوية في المحلات المعروفة.. نقدر نقول إنها نصب علني وتهريج تقيل في ظل الأزمة الاقتصادية الحالية.

    اقرئي أيضًا: أشهر 10 بقع على ملابس أطفالك وكيف تتخلصين منها

    علشان كدة كان الحل للحصول على كسوة ملابس شتوية بأسعار معقولة متبهدلش الميزانية في شوية خطوات وحيل، هاحكيلكم عليها:

    1- الملابس الداخلية القطن: اشتريتها من محلات صغيرة صناعتها مصرية 100% وخامتها قطن مصري..أكثر من رائعة، وسعرها تقريبًا في حدود 20 - 30 جنيه للقطعة حسب سن الطفل، طبعًا ده في مقابل بيع نفس القطعة في محلات مشهورة ب 60 جنيه على الأقل والخامة صيني!

    2- ملابس البيت: وبتندرج من بيجامات خريفي لبيجامات شتوي تقيلة من خامات الميلتون والقطيفة والقطن المبطنة، أسعارها في نفس المحلات صناعة مصرية بتتراوح من 40 جنيه للبيجامات الخفيفة حتى 160 جنيه للبيجامة الديزني التلات قطع، وطبعًا فيه بيجامات يوصل سعرها إلى 70 و80 و100 جنيه ومختلف الأسعار والأشكال والخامات جيدة جدًا.. الحقيقة إني كنت متشككة وبقارن دايمًا بملابس المحلات المستوردة لكن في نفس الوقت لقيت إني هاشتري بيجامة بيت واحدة من المحلات المستوردة بسعر 3 بيجامات على الأقل من المحلات المصري، وفي النهاية الخامة تقريبًا واحدة.

    3- ملابس الخروج: وهنا التوفير في عدد القطع كان سيد الموقف، والحقيقة إني استغليت التخفيضات السنة اللي فاتت نهاية موسم الشتاء في شراء ملابس الشتاء الخاصة بالخروج لبنتي بمقاسات أكبر تناسبها السنة دي وكانت بأقل من نصف سعرها. لكن برضه للرغبة في التوفير، اشتري قطعة أو 2 وليكن جاكت وبالطو تقيل مع بلوفر وسويت شيرت يناسب فترة الخريف ونهاية الشتاء، وتحت الجاكت أو البالطو ممكن تيشرتات قطنية هاف كول أسعارها بتبدأ من 25 جنيه، أساسًا خروج الأطفال في الشتاء محدود جدًا وموسم الشتاء في مصر قصير جدًا، فبالتالي استثمري في جاكت أو بالطو غالي شوية لكن هيناسب جو الشتاء القارص، ويناسب طفلكِ موسم أو 2 أحسن من بلوفرات وقطع في النهاية هتصغر بسرعة وأسعارها مقاربة لأسعار الجواكت والبالطوهات.

    4- البنطلونات الجينز والتيشرتات الكم الخفيفة والبلوفرات اللي صغرت من الشتاء اللي فات ممكن تتلبس وتحتها قميص أو فوقها جاكت.

    اقرئي أيضًا: نصائح لملابس الأطفال الشتوية

    فكروا بذكاء يا ماميز واعرفوا دايمًا إن شراء المنتجات لأنها من محل مشهور أو ماركة معروفة، خدعة كبيرة جدًا ممكن نتخلص منها بسهولة لأن في منتجات بنصف السعر وخامتها وجودتها أفضل بكتير، في محلات تانية.

    ودي قائمة بالمحلات اللي بتبيع منتجات مصرية للأطفال وتسوقت منها بالأسعار السابق ذكرها:

    • محلات التوحيد والنور

    • محلات Our kids بفروعها في المعادي والدقي والمهندسين

    • محلات الصياد في شيراتون 

    • محلات جونيورز في مصر الجديدة

    عودة إلى منوعات

    باسنت إبراهيم إبراهيم إبراهيم

    بقلم/

    باسنت إبراهيم إبراهيم إبراهيم

    أتمنى أن أكون سوبر ماما، بعد أن أنجبت صغيرة جميلة فريدة عمرها شهور، أتعلم معها الصبر والأمومة وتلهمني بالعديد من الأفكار عن رعاية الرضع والاهتمام بهم مع عالم كامل من السهر والصبر الشديد.

    موضوعات أخرى
    supermama
    Share via WhatsappWhatsapp IconSend In MessengerMessenger IconShare via FacebookFacebook Icon